Jou Desember/Januarie-uitgawe van LIG is op pad! Dit is by verre dié lekkerste uitgawe van 2009. What a way to end off a year!
LIG is die feesseisoen propvol pragfoto’s, lekker stories en vakansievreugde. Iets waarin jy jou tande behoorlik kan insink.
Daar was ’n week van aaneenlopende shoots (and then some) …
Ons het afgeskop met ons eerste van agt in die land van melk en heuning –Mosselbaai!
Maria van die baai
Baie van julle sal presies weet wie sy is sodra jy die kenmerkende handtekening op haar skilderye sien – MARIA. In dieselfde growwe tegniek as haar beeldskone paintings.
“Môs-sel-baai! Môs-sel-baai! Môs-sel-baai!” het ons op ons hardste gesing toe ons verby Mosgas op die N2 ry – so terwyl ons ook hande klap. Net so opgewonde soos Neelsie van Orkney Snorkney wanneer hy sê: “ek gaan sie toe”.
Dit was ’n skone dag – nie eens ’n wolkie om ’n demper op die gees te plaas nie. So mooi asof Maria dit self so geverf het. Om deur sulke inspirerende mense omring te word is sowaar die grootste rykdom.
Gaan lees gerus op bladsy 25 hoe om een van die gesogte skilderye te wen.
Naweke soos dié is net genoeg om jou te terg. En hoe vinnig vlieg jou naweek wanneer jy op ’n Saterdag werk – maar wie kla wanneer die strand jou kantoor is?
Agter die skerms
Die Sondagoggend was daar net genoeg tyd vir ontbythappies, waentjie-pak en in die pad val terug Boland toe. Maar die enjins was skaars koud, want Maandagoggend vroeg is ek weer op pad die diep Kaap in … Vandag shoot ons die Rubriekskrywers. Daardie mense wie se foto’s maand na maand saam met hulle rubrieke verskyn, ja, hulle bestaan regtig, en elke maand bly hulle nederig agter die skerms terwyl ons die pitkos wat hulle vir ons gee met afwagting inwag en verslind. Kom ons loer bietjie agter die skerms …
’n GPS in Jozi
Ek dink nie ek was al ooit so senuweeagtig nie! BESTUUR IN JOHANNESBURG? Wat bedoel julle ek moet bestuur in Johannesburg?! Dankie tog die tannie van die Tom Tom-GPS het met my gesels – haar kalmerende stemmetjie het my rustig gehou deur al die padwerke, detours en verkeer wat die Goudstad na my kant toe gegooi het. En dankie tog die klein karretjie het aircon gehad, want om koel te bly wanneer jy erg stres in JHB-verkeer én op pad is na seker die belangrikste cover shoot van die jaar (op die warmste dag van die jaar!) is beslis nie speletjies nie.
’n Krismis-cover
Veilig by Morrells in Johannesburg is ons almal besig om reg te maak en rond te hardloop agter klein stoute Jasper aan. Hy is Schalk en Mandi se oudste J Hier is vir julle bietjie kiekies van Krismis in Oktober.
Op stel by Binnelanders
Die volgende oggend het ek gou ’n draai gaan maak by Ernst Swart, hy is die publisiteitshoof van Binnelanders. Net om bietjie te sien hoe word die dinge hier gedoen.
Ek hoop julle almal het ingeskryf vir ons kompetisie in die November-uitgawe van LIG. Jy kan ’n dag op stel wen én lunch saam met die akteurs.
Kykie uit my verlede
Ek was nie altyd ‘n “Kypie” nie. Dié meisie is oorspronklik van Centurion, via Mosselbaai, via die groot Kaap en is nou veilig in die Boland. En vandag is die perfekte dag om weer in my ou strate te gaan rondry. Daar is net ʼn gevoel van gemaklikheid of kinderlike opgewondenheid om weer deur ʼn straat te ry of voor ʼn huis te staan waar jy twaalf jaar terug tuis was. Maar ook daai bietjie nostalgie en terug verlang. Hier is vir julle foto’s van my ou skool en huis – ʼn kykie uit my verlede.
My ma het altyd gesê: “Ons kan jou mooi aantrek……” en toe niks daarna nie. Ek neem aan dit het iets te doen met die feit dat ek nie baie gewoond is nie, of net bitterlik opgewonde kan raak oor klein goedjies, soos MENLYN-winkelsentrum!!! Oh my word. Canal Walk staan agter in die ry wanneer dit by dié reusagtige sentrum kom. WOW. Ek het drie flieks in ’n ry gaan kyk – net omdat die sitplekke so lekker gemaklik was.
Vurige vroue
Na my movie-maratonaand is ek vroeg uit die vere want vandag is ek star struck vir ’n ander rede. Dit is vandag die shoot met Bettie Cilliers-Barnard, haar dogter Jana Cilliers en haar dogters Lika en Léan. Wat ’n voorreg om ingenooi te word (al is dit net vir ’n dag) in dié huis propvol sterk vroue en waar kreatiwiteit om elke hoek en draai uitborrel. Jy kan sien Bettie raak nou ouer, haar lyfie is klein en haar velletjie dun, maar daar is soveel spark in ouma Bettie se oë. Sy herinner my aan Frida Kahlo – kreatief, hardkoppig, spesifiek en bo alles – sterk. Wat ’n ongelooflike ervaring.
Vanaand vlieg ek terug na die mooiste, mooiste Kaap. Ek dink nie ons lughawe was al ooit vir my so mooi nie. Dit het gevoel asof ek die landingstrook se teer wou soen toe ek my voetjies uit daai groen plane sit.
O, die donkie
Vroegdag is ekke al klaar weer op pad McGregor toe – goeie ding ek’t uitgevind dat jy na Robertson moet links draai, want gisteraand het ek nog gedink jy ry deur Montagu McGregor toe (ai, my wêreldjie is nog klein). Maar never the less, Eseltjiesrus het ons gevind. Die Donkey Sanctuary is voorwaar ’n baie spesiale plekkie. As jy ooit weer dalkies in die omgewing is, maak ’n draai. Dit is ’n lieflike veilige hawe wat vir elke donkie ’n plekkie in die son gee. Gaan loer gerus by http://www.donkeysanctuary.co.za hoe jy kan help – sou jy wou. Jy kan selfs jou eie donkie aanneem!
Ekke dink Donna het haar roeping as Donkie “whisperer” gemis.
Ons hou bruilof saam met Camy & Jaco (Marius van Villa Rosa)
LIG is so gelukkig om eksklusief Villa Rosa se glanstroue van die jaar te dek en by te woon. Ek en joernalis Conette is al 03:00 die oggend op om 04:00 te ry sodat ons 05:00 op die lughawe kan wees om die 06:30-vlug na Lanseria te kry. Phew, dis ’n mondvol en die vroeg opstaan was beslis nie ʼn grappie nie.
Hierdie is ons vroeg in die oggend gesiggies 
Ons moes 11:00 by Moon & Sixpence wees en aangesien ons vlug 08:30 geland het, het ons gereken dit sal ons genoeg tyd gee om na die venue in die boendoes te ry. GPS is ingestel en toe … net 11km tot die eindbestemming!!!!! WAT? Die onthaal is toe net 11km van die lughawe af. Ons kon nog lekker laat geslaap het soos gewone mense op ’n Saterdag. Nie te min, hier gaan ons.
Na ons ontbyt, sight seeing, klets, naels-verf en saam met die radio se Saterdag-treffers sing is dit toe tyd laat die dinge begin gebeur, en van daar af is dit net foto’s, blomme en die rustige bruid (sulke kalmte het ek nog nooit gesien nie!). Alles het seepglad verloop. Ons het bietjie skouers geskuur met ddisselblom en akteurs van Villa Rosa, onder andere Lieb bester en Harald Richter. Nadat die dansvloer geopen is en die reusagtige koek gesny is het die bruilofgangers jolig tot in die oggendure partytjie gehou.
Baie geluk Camy & Jaco! Mag julle lewens saam vol vreugde, geluk, geloof en liefde wees. xxx
Vrede, vreugde en feesvier in Franschoek
Ek het so rukkie terug sommer net op die wynplaas Eikehof ingeval (regtig, dit was vir my soooooo mooi toe ek daar verbyry, dat ek net daar afgedraai het en iemand daar gaan soek het met wie ek kan praat). Ek het dadelik vir Francois Malherbe gaan vra of ons nie dalk on jaarlikse Kerstafel op sy werf kan shoot nie. Op die dag het selfs die slegte weer en reën niemand se gees en entoesiasme gedemp nie want almal het besef hoe geseënd ons is om in ou Kaapse styl te kuier op ʼn lieflike wynplaas.
Die Kerstafel was vanjaar waarlik spesiaal. Afrikaans kraai koning en local is lekker! Met Sjef Abe van Noop-restaurant in die Paarl aan die stuur van die spyskaart en ons gaste Johan Bakkes, Nico Nel, Paul Eilers en Elias P Nel in beheer van ons gesprek oor lewensvreugde. En dan nie eers te praat van Oom Koos wat die trekklavier gekielie het nie.
Vreugde was in oorvloed. Mag julle eie Kerstafels ook kreun van vreugde, én julle geliefdes naby wees in die Kerstyd.
Mag die jaar wat vir ons voorlê seën en voorspoed inhou en mag ons altyd mense mooi behandel en twee keer dink voor ons kwaai reageer én in gedagte hou dat almal altyd met iets worstel.
Ek hoop regtig julle geniet die uitgawe so baie soos ons geniet het om dit aanmekaar te sit. Daar is baie van onsself, lang dae en laat nagte hierin. Dankie vir al julle ondersteuning in 2009. Ons sien uit daarna om 2010 ook ’n pragjaar te maak saam met jou en LIG. Dankie aan almal wat elke maand dit moontlik maak om ‘n LIG te lewer. Al ons Fotograwe, Grimeerkunstenaars, Stiliste, Joernaliste en aan God vir al ons talente.
Geseënde Kersfees!
Onthou om in te skryf vir al die wonderlike kompetisies – daar is heerlike pryse te wen.
Ek het gister ‘n sms van ons “groen” lugredery ontvang, wat my inlig dat my 9:00 vlug gekanselleer is en dat hulle dit goed gedink het om my op die 10h00 vlug te sit. Nadat ‘n JHB shoot haarfyn gereel is met fotograaf, grimeering, stileering, venue, en natuurlik Therese en Marcus. Ai…
